राज्याचे माजी मुख्यमंत्री आणि विद्यमान उपमुख्यमंत्री एकनाथ शिंदे यांच्यावर कॉमेडियन कुणाल कामरा यांनी खालच्या पातळीची आणि अपमानास्पद कॉमेडी करून त्यांना टार्गेट करण्याचा प्रयत्न केला. हा प्रकार समाज माध्यमांवर व्हायरल झाल्यानंतर तीव्र प्रतिक्रिया उमटल्या आहेत. हिंदुहृदयसम्राट स्व. बाळासाहेब ठाकरे यांच्या विचारांचा वारसा कोणाकडे आहे हे महाराष्ट्रातील जनतेने ठरवले आहे. अशा प्रतिष्ठित नेत्याचा अपमान करून प्रसिद्धी मिळवण्याचा प्रयत्न अक्षम्य आहे. स्वातंत्र्याच्या नावाखाली स्वैराचार करण्याचा अधिकार कोणालाही नाही आणि राज्यातील कोणत्याही व्यक्तीला अपमानित करण्याचा प्रयत्न करणाऱ्यांवर कठोर कारवाई केली जाईल, असा इशारा मुख्यमंत्री देवेंद्र फडणवीस यांनी विधानसभेत दिला.
सभागृहात झालेल्या चर्चेदरम्यान काही सदस्यांनी समाज माध्यमांवर सुरू असलेल्या प्रकारांकडे लक्ष वेधले. यावर उत्तर देताना मुख्यमंत्री फडणवीस म्हणाले, अभिव्यक्ती स्वातंत्र्याचा आम्ही पूर्ण आदर करतो. मात्र हे स्वातंत्र्य स्वैराचारात बदलू शकत नाही. स्वातंत्र्याच्या मर्यादा असतात आणि त्या ओलांडल्या गेल्यास कायदा आपले काम करेल. राजकीय व्यंगचित्रे, टीका आणि हास्य हे लोकशाहीचा भाग आहेत. मात्र कोणत्याही नेत्याचा अपमान करून प्रसिद्धी मिळवण्याचा प्रयत्न अक्षम्य आहे.
प्रसिद्धीसाठी कोणत्याही नेत्यावर खालच्या दर्जाची टीका करणे ही केवळ व्यक्ति, संस्था किंवा पक्षावर टीका नसून संपूर्ण लोकशाही व्यवस्थेचा अपमान आहे. महाराष्ट्राची संस्कृती टीका आणि व्यंग्याला स्थान देते, मात्र अश्लीलपणा आणि अपमानास कोणतीही सूट नाही. प्रसिद्धीसाठी अपमान करण्याचा प्रकार जर कोणी करत असेल, तर त्यांच्यावर कठोर कारवाई केली जाईल.
मुख्यमंत्री म्हणाले की, एकनाथ शिंदे यांनी शिवसेना प्रमुख बाळासाहेब ठाकरे यांच्या हिंदुत्ववादी विचारांचा वारसा चालवत महाराष्ट्राच्या हितासाठी महत्त्वपूर्ण निर्णय घेतले आहेत. राज्यातील जनतेने त्यांच्या नेतृत्वावर विश्वास दाखवला आहे. शिंदे यांचा अपमान म्हणजे जनतेच्या भावनांचा अपमान आहे. त्यामुळे अशा प्रकारे अपमान करणाऱ्यांना सोडले जाणार नाही.
फडणवीस म्हणाले, राजकीय व्यंगचित्रे आणि टीका याला कोणताही विरोध नाही. मात्र व्यक्तिगत टीका आणि अपमानाचा प्रकार अयोग्य आहे. अभिव्यक्ती स्वातंत्र्याचा स्वीकार केला जाईल, परंतु दुसऱ्याच्या स्वातंत्र्यावर अतिक्रमण खपवून घेतले जाणार नाही.
मुख्यमंत्री फडणवीस यांनी स्पष्ट शब्दांत सांगितले की, प्रसिद्धीसाठी नेत्यांचा अपमान करणाऱ्या कोणालाही माफ केले जाणार नाही. समाज माध्यमांवर किंवा इतरत्र जर कोणी अशा प्रकारे नेत्यांचा अपमान करत असेल, तर कठोर कारवाई केली जाईल.
मुख्यमंत्री फडणवीस यांच्या या वक्तव्याला विधानसभेत जोरदार समर्थन मिळाले. अनेक सदस्यांनी या विषयावर चर्चा करत कॉमेडियन कुणाल कामरा यांच्यावर कारवाई करण्याची मागणी केली. लोकशाही व्यवस्थेचा अवमान करणाऱ्यांना धडा शिकवण्यासाठी त्वरित कार्यवाही करण्याची मागणीही करण्यात आली.
शेवटी मुख्यमंत्री फडणवीस यांनी ठाम शब्दांत सांगितले की, लोकशाहीत प्रत्येकालाच अभिव्यक्ती स्वातंत्र्याचा अधिकार आहे, मात्र स्वैराचार आणि अपमानास परवानगी नाही. अपमान करणाऱ्यांवर कठोर कारवाई केली जाईल आणि महाराष्ट्राच्या संस्कृतीचे रक्षण केले जाईल.